DILI—“Imi labele halo tuir Ministru Turizmu, Komérsiu no Indústria, Gil Alves,” Primeiru Ministru Xanana Gusmão dehan ba emprezáriu sira hodi hatudu liman dadauk ba Gil Alves ne’ebé la’o iha nia sorin.
Xefe Governu ko’alia lia hirak ne’e wainhira inagura Jacinto Department Store (JDS) no partisipa aniversáriu Jacinto Group ba dala 22 inklui mós aniversáriu CBMC (Conection Bussines Market Place Crist) ba tinan 3 iha Kuluhun, Segunda (12/12).
Iha inagurasaun ne’e, Gil Alves mós partisipa. Wainhira la’o hale’u hodi haree produtu sira ne’ebé fa’an iha loja Jacinto, Xanana interoga Gil dehan “be o nia produtu lokál iha ne’ebé?”.
“Agora ko’alia barak, maibé produtu lokál sosa tau iha armajen ne’e halo nusa ona ne’e? Produtu ne’e husik dodok de’it, kah?,” Xanana dehan ba Gil.
Gil oin mean no la hatán. Tamba ne’e, Xanana husu kedas ba emprezáriu sira ne’ebé la’o hamutuk ho nia atu labele hakat tuir modelu Gil tamba Gil sosa produtu lokál bohu iha armajen sai dodok.
“Imi (timoroan) labele tuir fali nia (Gil) tamba nia sosa produtu lokál tau iha armajen hein to’o dodok iha armajen . Ne’e la di’ak,” nia dehan iha partisipante sira ne’ebé partisipa iha inagurasaun JDS.
Xanana husu ba emprezáriu sira atu hanoin hodi kontribui ba dezenvolvimentu Nasional, tamba kuandu setór privadu fraku, konstrusaun estadu mós sei la la’o.
Tidak ada komentar:
Posting Komentar