Angela Freitas La Admitidu ba KAPREZ

Prezidenti Partidu Trabalhista, Maria Angela Freitas la admitidu sai kandidatu prezidenti repúblika (KAPREZ) periodu tinan 2012-2017 tamba la priense kritériu. 

Prezidenti Tribunál Rekursu, Claúdio de Jesus Ximenes fó sai rezultadu ofisiál ne’e iha Tersa (14/2), hafoin verifika iregularidade kandidatura prezidenti repúblika. 

Iha karta ne’ebé hetan asinatura husi Prezidenti TR, Claúdio Ximenes ne’e hateten ho lian portugués nune’e: “Não Admito candidature da Cidadão Angela Freitas da Silva a Presidente da Republica as eleições de 17 de Março de 2012, por não ter sido proposta, que pelo minimo total Nacional de 5000 aleitores, que pelo minimo distrital de 100 eleitores, com impõe o artigo 15⁰ da Lei 7/2006, de 28 de dezembro, alterada pela Lei 8/2011, de 22 de Junho”.  

Angela la pasa tamba proposta apoiante kandidatura ne’e la to’o iha tarjetu ne’ebé Konstuisaun determina ona katak, kada kandidatura tenki hetan apoiante hamutuk na’in 5000 no husi distritu 13 tenki iha sidadaun na’in 100.

Antes ne’e, KAPREZ Angela Freitas aprezenta apoiantes hamutuk 7.500 bá iha Tribunál Rekursu iha loron 18 Janeiru tinan 2012 ne’e. Maibé, tuir verifikasaun ne’ebé TR halo ne’e, apoiante ba kandidatura Angela Freitas ne’ebé rejistu husi distritu hanesan Aileu, Lautem, Liquiça, Manatuto, Oe-Cusse no Viqueque la to’o 100 eleitores. 

Tamba ne’e, iha momentu ne’ebá, Tribunál Rekursu (TR) husu ba Angela atu halo kompleta númeru apoiante ne’ebé hatama hamutuk 5547. Maski nune’e, TR halo analiza ba segundu aprezentasaun lista apoiante ne’ebé hatama husi KAPREZ Angela ne’e kontinua la to’o 100 apoiantes husi distritus no asinatura apoiante barak maka kontinua dupla.

Ho verifikasaun ne’ebé halo husi TR, KAPREZ Angela Freitas iha apoinates ne’ebé asina hamutuk 3.075 de’it mak válidu no la to’o 5000 apoiantes. Lista apoiante ba Angela husi distritu mínimu tebes. Iha Aileu apoiante iha de’it  25 ,  Covalima 75,  Lautem 35, Liquiça 59,  Manatuto 12 no Oe-Cusse 13.

Entretantu, Angela la satisfas ho desizaun Tribunál Rekursu ne’ebé fó sai katak  ninia kandidatura la admitidu. Nia konsidera iha manipulasaun no konspirasaun polítika iha verifikasaun apoiantes nia laran.

“Ha’u respeita desizaun Tribunál maibé ha’u hanoin desizaun ne’e mós la justu, la demokratiku no presiza iha investigasaun profunda. Ha’u hanoin Tribunál mós tenki hatene ema sira ne’ebé maka kualifika ba eleisaun ne’e tuir lolos barak tuir lei internasional sira la kualifika,” nia dehan ba jornalista sira iha ninia servisu fatin, Bairu Formosa, Tersa horiseik.

Nia husu ba Tribunál tenki fó sai desizuan ne’ebé justu no bazeia ba lei hodi haree didi’ak sidadaun ne’ebé merese atu ba iha prezidenti repúblika.

“Desizaun ida ne’e ha’u rasik labele responde, tamba iha manobrasaun no intervensaun polítika. Ne’ebé. povu maka tenki haree didi’ak desizaun Tribunál ne’e justu ka lae,”  nia dehan ho lian maka’as.

KAPREZ Admitidu

Maibé, KAPREZ sira ne’ebé admitidu maka hamutuk ema na’in 13. Kandidatu admitidu sira maka hanesan Dr. José Ramos Horta, Dr. Francisco Guterres Lu-Olo, Taur Matan Ruak, José Luís Guterres, Lasama, Francisco Gomes, Lucas da Costa, Rogerio Lobato, Angelita Pires, Maria do Ceu, Abílio de Araújo, Xavier no Manuel Tilman.

Ekipa vitória kandidatu José Ramos Horta, Taur Matan Ruak no José Luis Guterres hateten sira sente kontente ho desizaun Tribunál ne’ebé maka admite sira nia kandidatura avansa ba iha eleisaun prezidensiál.

Ekipa susesu kandidatu José Luís Guterres (JLG), Abel da Costa Larisina ne’ebé akompaña husi Ovidio de Jesus hodi simu notifikasaun ofisiál husi Tribunál hateten katak, kandidatura ne’e liu rekejitus hotu-hotu hodi tuir eleisaun prezidensiál. Tamba ne’e, ba  oin, sira sei halo servisu ho planu hodi kompete iha eleisaun.

Aleinde ne’e, koordenadór ekipa vitória kandidatura José Ramos Horta, Augusto Junior hateten notifikasaun ne’ebé simu husi Tribunál Rekursu ne’e hanesan orgullu ba sira atu prepara an hodi avansa ba iha kampaña eleitorál hodi bele lori kandidatura ba vitória iha eleisaun.

Tuir lei eleitorál, wainira laiha rekursu husi kandidatu prezidente repúblika ba desizaun Tribunál Rekusu iha Kuarta-feira ne’e, kandiatu ne’ebé maka admitido bele submete ba prosesu sorteiu númeru kandidatura ba iha eleisaun prezidensiál.