Ekipa Susesu Lasama Monta Rede iha Distritu 13

Atu manán iha eleisaun prezidensiál, ekipa susesu KAPREZ Fernando “Lasama” de Araújo oras ne’e dadauk monta ona rede ekipa susesu iha distritu sanulu resin tolu (13).

“Agora dadauk ami monta ona ekipa susesu ne’ebé lidera husi Dr. João Boavida hanesan diretór da kampaña Nasionál no ami monta ami nia rede ne’e ba iha distritu sanulu resin tolu. Husi nasionál ema ida sei halo ligasaun ba iha distritu no kada distritu hirak ne’e rasik sei monta ekipa susesu iha nível distritu. Ami uza mós estrutura Partidu Demokrátiku (PD) ninina hanesan aparellu ida ne’ebé maka bele fó apoiu ba kandidatura Lasama,” Portavos Ekipa Susesu KAPREZ Lasama, António da Conceição ba diáriu ne’e iha sede ekipa susesu Vila-Verde, Díli, Kuarta (08/02).

Alende forma ekipa susesu iha distritu, nia dehan, sira mós prepara ona kalendáriu ba kampaña KAPREZ Lasama nian no mós kontinua halo konsolidasaun hodi fó hanoin ba militante sira atu nafatin tau sira nia fiar ba PD no kandidatura Lasama.

Iha parte seluk, ekipa susesu KAPREZ Lasama mós kria ona ekipa ka grupu balu iha ekipa susesu nia laran hodi halo estudus, análiza no mós diskusaun hodi nune’e bele prepara matéria ba kandidatu prezidenti nian atu bele ko’alia iha kampaña.

Tuir kalendáriu provizóriu, lansamentu kampaña KAPREZ Lasama sei hahú iha Lospalos maka ba Distritu Baucau, Viqueque, Manufahi, Covalima, Bobonaro, Oe-Cusse, Díli maka foin ba fali distritu sira seluk.

Antes ne’e, servisu ne’ebé ekipa susesu halo tiha ona maka hanesan rekolla dokumentus apoiante no lori ba rejista iha notariadu iha loron 26 Janeiru, depois kontinua lori ba rejista iha Tribunál Rekursu iha 28 Janeiru.

Halibur Osan

Entretantu,  militante Partidu Demokrátiku iha distritu sanulu resin tolu voluntariamente fó kontribusaun osan ba sira nia prezidenti partidu atu bele hala’o kampaña prezidensiál.

“Orsamentu ne’ebé ami iha agora, mai husi ami nia militate rasik. To’o agora ne’e ami seidauk bele hetan orsamentu ida ne’ebé natón. Ami nia orsamentu ne’ebé preparadu atu halo kampaña foin maka besik rihun tolu nulu no orsamentu ne’e hanesan kontribusaun mai husi ami nia militantes,”  António da Conceição tenik.

Nia esplika kontribuisaun orsamentu ne’ebé militante sira fó ne’e, tau hamutuk iha konta bankaria ne’ebé ekipa susesu loke ne’ebé bolu naran Lasama Fund. Konta bankaria ne’e espesífika ba atividade kampaña.

Tuir informasaun, militante PD iha Maliana fó hela sumbangan no hetan ona besik rihun hitu resin no tuir planu sira hakarak intrega diretamente ba prezidenti PD para bele uza ba kampaña. Nune’e mós, iha Distritu Ainaro, militante sira halo ona kontribuisaun osan hamutuk rihun sanulu resin rua. Enkuantu iha Distritu Covalima no sira seluk mós oras ne’e dadauk halo hela movimentu ne’ebé hanesan hodi halibur osan.