Prevene Korupsaun Liu husi KAPREZ

Sábadu (25/2), Komisaun Anti Korupsaun (KAK) servisu hamutuk ho Komisaun Nasionál Eleisaun (CNE) sei hala’o semináriu nasionál hodi esplika ba kandidatu Prezidente Repúblika (KAPREZ) no Partidu Polítiku (PARPOL) kona-ba oinsá atu prevene korupsaun.

“Iha Sábadu aban, sei hala’o konferénsia konjuntu ne’ebé KAK ho CNE maka organiza hodi halibur PARPOL no kandidatu sira oinsá atu hare kona-ba valór transparénsia liu-liu orsamentu PARPOL. Faze ne’e hanesan antisipasaun husi KAK nian ba PARPOL para haree komitmentu kombate korupsaun,” dehan Komisáriu KAK Aderito de Jesus ba jornalista iha Salaun Canossa, Comoro, Díli, Kinta (23/2).

Konferénsia konjunta ne’ebé maka hala’o iha Sentru Konvensaun Díli  ho tema “Transparénsia no fiskalizasaun ba konta eleitorál, dalan atu hadook husi korupsaun eleitorál”.

Objetivu seluk husi konferénsia ne’e, Aderito esplika, atu reafirma komitmentu partidu polítiku sira kona-ba esforsu atu prevene no kombate korupsaun wainhira kaer ukun.

Peritus husi rai li’ur ne’ebé sei ko’alia iha konferénsia ne’e maka Michael Malley husi Komisaun Eleitorál Austrália, Hamdan Zoelva husi Tribunál Konstituiante Indonésia.

Husi rai laran nian maka hanesan Prezidenti Tribunál Rekursu, Claúdio Ximenes, Komisáriu CNE Faustino Cardoso, Komisáriu KAK Aderito de Jesus Soares no Komisáriu CNE Pe. Martinho Gusmão hanesan moderadór ba konferénsia ne’e.

Tópiku ne’ebé painalista aprezenta iha konferénsia ne’e inkluidu papel KAK nian iha prosesu eleitorál, leis eleitorál haree husi perspetiva legál no estudu komparativu kona-ba sistema eleitorál husi rejiaun ne’e.

Konferénsia konjunta ne’e sei partisipa husi partidu polítiku no kandidatu KAPREZ ho ofisiál governu, diplomatiku, sosiedade sivíl no sosiedade sira ne’ebé iha interese ba polítika TL.

Lansa Portal

Entretantu, iha Kinta horisehik, KAK selebra nia tinan ba daruak (22 Fevereiru 2010-22 Fevereiru 2012) ne’ebé selebra hamutuk ho estudante sira. Iha okaziaun ne’e, lansa mós portal KAK www.cac.tl.

Komisáriu Aderito de Jesus hateten kolaborasaun ne’e importante atu muda persepsaun korupsaun ne’ebé maka hetan iha instituisaun privadu no estadu.

 “Servisu balun ami halo hahú ona, maibé presiza atu mellora nafatin. Ha’u hanoin iha tinan ne’e tuir planu atu hala’o atividade no implementa liu tan misaun prevensaun no investigasaun kriminál,” nia dehan ba jornalista sira iha Canossa Comoro, Kinta horisehik.

Nia esplika prosesu investigasaun KAK hetan suporta husi Ministériu Públiku atravez prokuradores hodi haree kona-ba investigasaun kriminál. Maibé, tuir nia, investigasaun de’it sei la muda mentalidade korupsaun. Ne’eduni, nia tenik, iha tinan ne’e KAK sei hala’o mós kampaña hodi involve sosiedade sivíl, estudantes, komunidade hodi eplika oinsá atu prevene korupsaun.

Nia dehan portal www.cac.tl atu fasilita públiku hodi informa kona-ba aktus krimi korupsaun ne’ebé involve husi oknum iha instituisaun.

Tuir loloos, selebrasaun tinan KAK ne’e hala’o iha Kuarta maibé la konsege tamba Kuarta-Feira Sinzas.