Negosiasaun Greater Sunrise,

Alkatiri: Xanana Fó Todan ba Governu Foun

Sekretáriu Jerál Partidu FRETILIN, Marí Alkatiri hateten governasaun ne’ebé lidera husi Primeiru Ministru Xanana Gusmão prepara hela todan bo’ot ba Gvernu foun tamba la konsege halo negosiasaun ba Greater Sunrise.

“Xanana ho nia Governu maka husik todan ida ne’e ba governu foun. Durante kaer Governu tinan lima, Xanana la konsege rezolve problema Greater Sunrise. Povu tenke hatene buat ida ne’e,” Marí dehan ba jornalista sira hafoin hasoru malu ho Uniaun Juventude Sosialista Internasionál iha sede Comite Central FRETILIN (CCF).

Eis Primeiru Ministru hatutan Governu AMP hatudu momós ona katak, laiha kapasidade atu halo negosiasaun ba Greater Sunrise no hatene hakilar dehan dada Pipeline Greater Sunrise mai TL maibé realidade ukun atu ramata mós pipeline ne’e la mai.

“Todan barak maka Governu ida ne’e husik ba Governu foun maka negosiasuan ne’ebé la konsege halo. Todan ba divida, projetus ne’ebé laiha sustentável ba infraestrutura ninian, todan ba inflasaun ne’ebé sa’e beibeik, todan ba osan ne’ebé gasta nar-naran de'it no halo ema lubun ida maka sai riku matak,” nia esplika.

Ho ida ne’e, Marí tenik, bainhira FRETILIN manán hodi kaer Governu, sei halo mudansa situasaun sira ne’ebé akontese dadauk ne’e iha Governu AMP, atu nune'e bele hala’o dezenvolvimentu di'ak liu iha nasaun laran.

Maske nune’e, Vise Primeiru Ministru José Luís Guterres katak, Governu ne’e laiha intensaun atu husik hela dívida ba Governu foun ne’ebé mai, maibé husu atu hotu-hotu hamutuk hadi’a buat ne’ebé maka Governu ne’e la konsege hadi’a iha tempu ukun. Tuir José Luís Guterres (JLG) katak, atu hadi’a sistema la’os fasil, maibé presiza tempu.

UISY Apresia Planu FRETILIN

Uniaun Juventude Sosialista Internasional (IUSY), apresia planu no programa partidu FRETILIN nian ba dezenvolvimentu Nasionál liu-liu iha área sosiál, ekonomia no polítika iha rai laran.

Juventude Sosialista Internasionál hasoru malu ho Sekretáriu Jerál Partidu FRETILIN Marí Alkatiri iha Gabinete Sekretáriu Jerál Comoro Díli, Kuarta horisehik, hodi rona informasaun husi partidu FRETILIN ba dezenvolvimentu Nasionál.

Iha inkontru ne’e, Marí haklaken, Joventude Sosialista Internasionál halo kontaktu ho FRETILIN, atu rona planu no programa polítika partidu FRETILIN nian hodi hasoru eleisaun prezidensiál no parlamentár  tinan 2012 ne’e.

“Sira kontenti tamba bele rona informasaun husi Partidu FRETILIN liu-liu ba dezenvolvimentu, polítika, sosiál no ekonómika. Sira hakarak hatene FRETILIN manán iha eleisaun, diferensa saida maka atu halo hodi kombate korupsaun ne’ebé maka’as iha TL,” nia haktuir.

 “Ha'u hateten ba sira momós de'it katak povu ida ne’e presiza Governu ida ne’ebé kombate korupsaun, bele hao dezenvolvimentu ne’ebé fó benifisiu ba povu TL no la’os ba ema balun de'it,” Marí akresenta.