DÍLI—Atu pesta demokrasia iha elisaun tinan 2012 lao ho di’ak no imaze nasaun Timor Leste nia iha mundu di’ak, Primeiro Ministro (PM), Kay Rala Xanana Gusmão husu ba Kandidatura Prezidenti (KAPREZ) RDTL periode tinan 2012 to’o tinan 2017 atu labele sukit malu ho problema tuan durante kampaña.
“Durante kampaña kaprez sira husu atu hato’o programa servisu ne’ebé iha. labele lori fali kazu tuan-tuan sira mai iha kampaña hodi sukit malu. Hare ba oin. Labele hateke ba kotuk hodi sai hanesan argumentu ba kampaña,” hateten PM Xanana ba jornalista sira foin lalais ne’e relasiona ho Kaprez nain 14 ne’ebé hatama ona ba tribunal.
Nia hateten, durante kampaña lideransa ne’ebé sai Kaprez ne’e tenki hatudu ona moturnidade polítika liu husi kontribui ba estabilidade nasionál atu festa demokrasia bele la’o di’ak liu tan.
Katak Xanana, iha konstituisaun hateten ona Prezidenti Repúblika RDTL tenki garante Unidade Nasionál. Ne’ebé kandidatura sira mós tenki hatudu no garantia paz estabilidade iha kampaña prezidnesial ne’e.
“Tenki hatudu Unidade nasionál. Hakuak ema hotu-hotu atu prosesu kampaña prezidensial bele la’o didiak,” dehan eis Prezidenti Repúblika ne’e.
Iha parte seluk ekipa suseisu ida husi Kaprez nain 14 , Jose Luis Guteres (JLG) liu husi nia ekipa suseisu, Cesar Morreira ba Timor Post hateten, Partidu Frenti Mudansa (PFM) iha baze sei lori JLG ba Vitoria iha elisaun Presidenti RDTL periode tinan 2012 to’o 2017.
Hateten Cesar, Kaprez JLG atu hetan vitoria, estrutura baze iha PFM tenki hala’o uluk kongresu nasional atu bele servisu besik liu ho estrutura distritu, sub-distritu, suku to’o aldeia
hodi haforti programa no planu ne’ebé ekipa susesu kria ona.
“Ba distritu lima ne’ebé apoiantes JLG barak, programa dor to dor (tama uma sai uma) hodi tur hamutuk ho apoiantes no simpatezantes sira koalia prespektiva polítika kandidatura JLG lao dau-daun,” haktuir Sezar.
Konaba Kaprez sira labele sukit malu durante kampaña katak Sezar, atu asegura seguransa Nasaun RDTL tuir prisipiu nasaun nian, sira prepara ona material atu koalia durante kampaña.Katak Sezar, presidente tenki ema ne’ebé hadomi povu. Tamba ne’e maka seguransa nasional importante.
Labele sukit malu durante kampaña ne’e parte importante kontribui ba unidade nasional hodi minimize konflitu. Labele halo krime hasoru povu. Kaprez JLG durante ne’e iha relasaun di’ak ho povu, relasaun bilateral no internasional. Lia fuan hanesan mai husi Koordenador Jerál ekipa suseisu JLG, Abel Ximenes Lari Sina.
Nia hateten, atu lori JLG ba tur iha palasiu Presidenti RDTL, ekipa suseisu sei hasoru aitaral barak.
“Desde 1974 kandidatura JLG halo kampañia ba iha rai laran no fó defende estabilidade ba nasaun ne’e ,tan ne’e ho nia atetudi no esforsu hirak ne’e ami sei kontinua esforsu tinan ne’e kandidatura LLG sei ba tur duni iha palasio Prezidente bairo Pite,” nia garantia.
Orario Kampaña
Relasiona ho orariu kampaña Kaprez RDTL esplika komisario Comisaun Nacional Elisoens (CNE), Arif Abdullah Sagran sei fo sai hafoin Tribunal Rekurso fo sai rezultadu final lista kandidatura sese de’it maka bele kompete iha elisaun tinan 2012.
‘’Ita hatene katak loron 15 nia laran antes elisaun plus loron rua ba hari tenang sei iha kampana, antes kampana ami sei husu ba kandidatu sira hatama sira nia orario kampana,’’ Arif iha nia servisu fatin, Sesta, (03/02).
Nia haktuir tan katak, parte CNE sei husu orario kampana husi candidatu Presidente sira atu nune’e iha tempu elisaun mai ne’e labele akontese soke malu.
‘’Ami bele hare’e sekarik iha kandidatu A ho B iha soke malu iha fatin ida ami sei bolu sira nain rua mai par abele muda fatin para labele soke malu durante loron 15 kampana nomos ami sei halo fiskalizasaun, labele koalia lia at tuir regulamentu nebe maka iha ona,’’dehan komisario CNE ne’e.
Tanba ne’e, agora dadaun CNE komesa halo ona dialogu ho Candidatu presidente da repúblika sira konaba kodigu konduta ou regulamentu saida maka sira tenke halo no labele halo iha tempu kampana nia laran.
Entertantu tuir kalendario nebe fo sai ona iha Jornal da repúblika haktuir, data kampana ba president da repúblika sei halao iha dia 29 fevereiro to’o 14 Marsu 2012 no hafoin deskansa durante loron rua nia laran, iha dia 17 de marsu elisaun ba presidente da repúblika.
To’o oras ne’e dadaun kandidatu ne’ebé rejista ona iha TR hamutuk iha ona nain sanulu resin haat. Kandidatu sira ne’e mak hanesan, José Luis Guterres, Xavier do Amaral, Manuel Tilman, Maria do Ceú Lopes da Silva, José Manuel Ramos Horta, Lu-Olo, Lasama, Agelita Pires, Rogerio Lobato, Francisco Gomes, Lucas da Costa Abilio Araujo, Taur Matan Ruak no Maria Agela Freitas.
Tidak ada komentar:
Posting Komentar