Kompleta Ekipamentu PNTL!

Komandante Jerál Polísia Nasionál Timor-Leste (PNTL), Longuinhos Monteiro husu ba Governu katak antes eleisaun tenke kompleta ona ekipamentus no nesesidade seguransa nian.

“Ha’u sempre eziji ba Governu para kompleta buat ne’ebé ami presiza antes eleisaun.Governu maka iha planu hodi atende situasaun ne’ebé maka polísia infrenta,” Monteiro dehan ba jornalista sira iha Tasi-Tolu, Díli, Kuarta (08/2).

Komandante PNTL lamenta tamba agora dadaun eleisaun hela fulan ida, maibé seidauk iha fasilidade no ekipamentus seguransa nian. Nia mós preokupa ho ekipamentu Tamen ne’ebé proteje polísia iha situasaun perigu laiha kualidade.

Nia haktuir ezersísiu konjuntu ne’ebé maka hala’o husi unidade tomak husi polísia nasionál no internasional iha Tasi-Tolu,  rezulta tamen rahun barak.  Tamen laiha kualidade tamba tipu ne’ebé PNTL propoin ba Governu no kompaña atu hola maibé bá hola fali tamen ho tipu seluk.

“Ha’u husu ba Governu atu wainhira kontrata kompaña hola ekipamentus seguransa tenke hola tuir tipo ne’ebé maka PNTL sujere nune’e fó protesaun ba polísia iha terenu,” Longuinhos informa.

Iha okaziaun ne’e,  Komisáriu Polísia Nasoens Unidas (UNPol), Luís Carrilho komenta katak atu garante liu-tan seguransa iha festa demokrásia, importante mak polísia tenke iha kondisaun hodi fó seguransa ba sidadaun tomak atu nune’e povu sira livre atu ejérse sira nia direitu liu husi votu iha eleisaun mai.

“Polísia Nasoens Unidas la’os apoiu de’it formasaun atu hasa’e kapasidade maibé UNPol apoiu mós nesesidade ne’ebé maka PNTL infrenta entermus lojístika,” nia esklarese.

Nia hatutan UNPol prontu atu apoiu polísia Nasionál Timor-Leste atu bele kompleta nesesidade ne’ebé sei falta.