Kamis, 23 Februari 2012

Estadu Apoiu Orsamentu Ba KAPREZ


Kandidatu Prezidenti Repúblika (KAPREZ) ofisialmente hetan osan husi Estadu ba kampaña. Kada kandidatu sei simu US$10.000.00.
Desizaun ne’e fó sai liu husi reuniaun extraordináriu Konsellu Ministru iha Palásiu Governu, Kinta (16/02), relasiona ho preokupasaun kona-ba subsídiu ba KAPREZ.
Ho apoiu ne’ebé Governu deside ona ne’e, tamba iha nesesidade atu asegura kandidatu hotu ba eleisaun prezidente repúblika.
Totál orsamentu ne’ebé Governu prepara ba KAPREZ hamutuk US$120.000.00. Orsamentu refere ba eleisaun primeira volta nian.
Maske nune’e, Governu mós deside hodi prepara orsamentu ba KAPREZ ba segunda volta nian. Osan ba eleisaun segunda vota, kada kandidatu sei simu ho valor hanesan iha primeira volta (US$10.000.00).
Antes ne’e, orsamentu ba KAPREZ laiha tamba Parlamentu Nasionál la aprova iha Orsamentu Jerál Estadu 2012. Maibé, tamba hetan krítika husi kandidatu sira, ikus mai obriga Komisaun Nasionál Eleisaun (CNE) halo proposta ba Governu para reativa hikas orsamentu ba KAPREZ.

Denge Hamate Pasiente 2 Iha HNGV


Bazeia ba relatóriu ne’ebé fó sai husi Protokolu Hospitál Nasionál Guido Valadares (HNGV) katak, pasiente na’in rua maka Kinta horisehik mate tan iha sala pedeatria tamba moras denge.
Pasiente rua ne’e maka hanesan Fátima Logo (fulan 4 husi Bemori) mate iha dadersan maizumenus tuku 07:00 Otl no Geofanio Ciqueira (tinan 4 husi Tibar) mate iha dadersan maizumenus tuku 09:00 Otl.
Antes ne’e mós, pasiente na’in tolu maka mate uluk iha semana kotuk. Tamba ne’e, sura ba mai pasiente na’in lima ona maka mate iha iha HNGV.
Parte seluk, tuir relatóriu ne’ebé  fó sai husi Xefe Departementu Ambulatóriu no Banku Urjénsia HNGV, Américo dos Santos katak, maske pasiente na’in rua ne’ebé mate iha pedeatria ne’e mate tamba moras denge maibé ne’e la’os nia parte maka toma konta.
Nia esplika, pasiente ne’ebé mate iha pedeatria la’os nia parte maka toma konta tamba nia la responsabiliza  kona-ba pasiente iha pedeatria. Husi nia parte, nia haktuir, to’o agora seidauk rezulta pasiente ruma maka mate tamba denge.
“Tuir ha’u nia haree katak kazu denge ne’e to’o agora sei tun sa’e iha Banku Urjénsia,” nia informa.
Maske, tuir nia, moras denge iha parte banku urjénsia sei kuntinua tun sa’e, maibé rezultadu hatudu katak, pasiente sira ne’ebé uluk baixa iha sala sity scan oras ne’e dadaun mamuk ona no iha parte sala reuniaun pasiente kuaze menus ona husi 20 no tun ba 14.
Entaun ida ne’e signifika katak, emfermeiru no doutor sira iha duni vontade diak no halo esforsu makas tebes tuir promesa ne’ebé sira iha. Nune’e moras denge ne’ebé tama iha banku urjénsia barak mak mai husi klínika.
Iha parte seluk Timor post simu relatóriu durante loron rua hahu husi kuarta horbainrua no horseik husi parte protocolo HNGV, pasiente moras denge ne’ebé baixa iha sala pedeatria hamutuk 20, sity scan laiha, sala reuniaun 14, iha unit gawat darurat (UDG) ka banku urjénsia 5.
Entertantu relasiona ho denge refere Vise Ministra da Saude Madalena Hanjam,  husu ba povu tomak iha timor lataran atu partisipa iha kampana limpeza hodi nune’e bele halo previensaun ba moras denge ne’ebé indentifika sa’e makas iha TL li-liu Baucau, Manatutu, Liquiça no Díli.
“Liu husi kampana limpeza mak ita bele halo previensaun ba moras denge, tamba ne’e husu ba povu tomak atu partisipa”propoin Vise Ministra relasiona ho moras denge ne’ebé aumenta as iha HNGV durante fulan rua nia laran.
Strategia kampana ne’ebé mak ministériu saude kria, tuir Hanjam oras ne’e hala’o ona iha distritu no sub distritu li-liu uza abate iha bee hodi rega susu.
Atu prevene moras refere, nia dehan, la’os de’it kompeténsia ministériu saude mas kompetente ema hotu nian li-liu povu rasik mak tenke kuidadu an hodi halo limpeza hanesan hamos foer iha uma oin no aruma kalena no roda at li-liu halo limpeza iha uma laran kada semana ida dala ida.

Apoiu Kama 20
Hospitál Nasionál Guido Valadares (HNGV) hetan apoiu kama 20 husi Governu Austrália liu husi  Klínika Bairo-Pite.
Apoiu refere,  bazeia ba proposta ne’ebé mak HNGV ho Assosiasaun dos Enfermeirus halo hodi aprezenta ba Klínika refere foin lalais.
“kama ne’ebé ajuda husi klínika Bairo-Pite tuir proposta ne’ebé maka momentu ne’eba assosiasaun enfermeirus timor leste distritu Díli hamutuk ho hospitál nasionál halo proposta ida ba iha klínika bairo pite li-liu konaba kama ba pasiente sira”informa xefe Departementu Administrasaun Finanasas e logistika HNGV Santana Martins, B, DC.
Apoiu ne’ebé mak Austrália fó liu husi klínika bairo pite relaasiona ho kondisaun HNGV ne’ebé durante ne’e limita tebes fatin ou kama ba pasiente sira atu utiliza bainhira pasiente sira ba hala’o tratamentu no baixa iha hospitál nasionál refere.
Tuir nia, kama tuan ne’ebé iha tempu indonesia nian persija atu troka, no tenke tau fali kama foun. No kama 20 ne’ebé HNGV simu liu husi departementu finansas e logistik HNGV horseik halo ona distribuisaun ba kama 10 ba parte banku urjénsia. Alende tuir planu sei mós 10 ba iha parte emfermaria.
Nune’e kama ne’ebé ofrese husi Austrália liu husi klínika bairo pite tuir nia, iha difrensia bot ho kama sira seluk ne’ebé durante ne’e pasiente sira uza ona iha HNGV, tamba kama refere bainhira prosesu muda tenke uza eletrik ka remut.
“Tamba ne’e ami husu ba familia pasiente sira bainhira uza kama ne’e tenke uza ho diak no tenke kuidadu e labele atu naran buti arbiru remut kama nian”fó atensaun nia.
Ho apoiu ne’e, Xefe Departementu Ambulatóriu n Banku Urjénsia Américo dos Santos hato’o agradesementu bot ba esforsu ne’ebé assosiasaun dos enfermeirus no hospitál nasionál iha. Tamba liu husi esforsu refere mak konsege hetan apoiu husi Austrália hodi sfrese kama ba iha Banku Urjénsia no parte sira seluk iha HNGV.
“Ha’u agradese tebes ba apoiu ne’e, e apoiu ne’e maske seidauk bele dehan sufisiente ona maibé pelumenus bele auguenta ba pasiente sira ne’ebé mak tama iha banku urjénsia,”agradese nia.
Entretantu, bainhira Timor Post konfirma ho responsável Klínika Bairu-Pite, maibé tuir pesoál iha klínika refere hatete responsável klínika laiha tempu tamba atende hela pasiente sira.

Prevene Korupsaun Liu husi KAPREZ


Sábadu (25/2), Komisaun Anti Korupsaun (KAK) servisu hamutuk ho Komisaun Nasionál Eleisaun (CNE) sei hala’o semináriu nasionál hodi esplika ba kandidatu Prezidente Repúblika (KAPREZ) no Partidu Polítiku (PARPOL) kona-ba oinsá atu prevene korupsaun.
“Iha Sábadu aban, sei hala’o konferénsia konjuntu ne’ebé KAK ho CNE maka organiza hodi halibur PARPOL no kandidatu sira oinsá atu hare kona-ba valór transparénsia liu-liu orsamentu PARPOL. Faze ne’e hanesan antisipasaun husi KAK nian ba PARPOL para haree komitmentu kombate korupsaun,” dehan Komisáriu KAK Aderito de Jesus ba jornalista iha Salaun Canossa, Comoro, Díli, Kinta (23/2).
Konferénsia konjunta ne’ebé maka hala’o iha Sentru Konvensaun Díli  ho tema “Transparénsia no fiskalizasaun ba konta eleitorál, dalan atu hadook husi korupsaun eleitorál”.
Objetivu seluk husi konferénsia ne’e, Aderito esplika, atu reafirma komitmentu partidu polítiku sira kona-ba esforsu atu prevene no kombate korupsaun wainhira kaer ukun.
Peritus husi rai li’ur ne’ebé sei ko’alia iha konferénsia ne’e maka Michael Malley husi Komisaun Eleitorál Austrália, Hamdan Zoelva husi Tribunál Konstituiante Indonésia.
Husi rai laran nian maka hanesan Prezidenti Tribunál Rekursu, Claúdio Ximenes, Komisáriu CNE Faustino Cardoso, Komisáriu KAK Aderito de Jesus Soares no Komisáriu CNE Pe. Martinho Gusmão hanesan moderadór ba konferénsia ne’e.
Tópiku ne’ebé painalista aprezenta iha konferénsia ne’e inkluidu papel KAK nian iha prosesu eleitorál, leis eleitorál haree husi perspetiva legál no estudu komparativu kona-ba sistema eleitorál husi rejiaun ne’e.
Konferénsia konjunta ne’e sei partisipa husi partidu polítiku no kandidatu KAPREZ ho ofisiál governu, diplomatiku, sosiedade sivíl no sosiedade sira ne’ebé iha interese ba polítika TL.
Lansa Portal
Entretantu, iha Kinta horisehik, KAK selebra nia tinan ba daruak (22 Fevereiru 2010-22 Fevereiru 2012) ne’ebé selebra hamutuk ho estudante sira. Iha okaziaun ne’e, lansa mós portal KAK www.cac.tl.
Komisáriu Aderito de Jesus hateten kolaborasaun ne’e importante atu muda persepsaun korupsaun ne’ebé maka hetan iha instituisaun privadu no estadu.
 “Servisu balun ami halo hahú ona, maibé presiza atu mellora nafatin. Ha’u hanoin iha tinan ne’e tuir planu atu hala’o atividade no implementa liu tan misaun prevensaun no investigasaun kriminál,” nia dehan ba jornalista sira iha Canossa Comoro, Kinta horisehik.
Nia esplika prosesu investigasaun KAK hetan suporta husi Ministériu Públiku atravez prokuradores hodi haree kona-ba investigasaun kriminál. Maibé, tuir nia, investigasaun de’it sei la muda mentalidade korupsaun. Ne’eduni, nia tenik, iha tinan ne’e KAK sei hala’o mós kampaña hodi involve sosiedade sivíl, estudantes, komunidade hodi eplika oinsá atu prevene korupsaun.
Nia dehan portal www.cac.tl atu fasilita públiku hodi informa kona-ba aktus krimi korupsaun ne’ebé involve husi oknum iha instituisaun.
Tuir loloos, selebrasaun tinan KAK ne’e hala’o iha Kuarta maibé la konsege tamba Kuarta-Feira Sinzas.

Tinan 30 Iha Politika, Agora Luta Bá Dezenvolvimentu Nasionál

DILI—Maria do Céo Lopes da Silva ne’ebé durante tinan 30 nia laran partisipa iha Luta bá libertasaun Nasionál ka ukun aan no agora dadauk hakarak Luta nafatin bá dezenvolvimentu Nasaun Timor Leste tomak, liu husi aprezentsaun kandidatura bá Prezidenti Republika (PR).
Kandidata Prezidente da República de Timor-Leste bá Eleisaun 2012 ne’ebé ho moto mak “SERBI, LA HEIN SIMU KOLEN” mak ho naran Kompletu, Maria do Céu Lopes da Silva, koñesida Mana Céu.
Kandidatura PR, Maria do Céo ne’ebé kontribui makas iha ita nia luta libertasaun Nasionál, maski iha Povu timor Leste balu ladun kuñese, maibé iha barak ne’ebé kuñese didiak kandidatura Maria do Céo, ne’ebé luta hodi lori bá publiku.
Tuir Ekipa volontariu kandidatura Maria do Çéo lopes da Silva, Laura Abrantes hateten katak, kandidatura Maria do Céo ne’e iha esperiensia ne’ebé mak Hakar mós kontribui bá dezenvolvimentu Nasionál.
Nia dehan, Kadidatura PR, Periodu tinan 2012-2017 ne’e iha sidadaun balu ne’ebé kuñese, maibé iha balu mós la kuñese ne’ebé liu husi kandidatura PR ne’e atu bele hetan kuñesimentu povu nian bá Maria do Céo ne’ebé sei compete ho kandidatura sira seluk iha elelsiaun prezidensial loron 17 fulan marsu tinan ne’e.

Maki nune’e, Maria Abrantes mós dehan tan katak, ho apoiante kandidatura Maria Céo ne’ebé lori bá rezistu iha Tribunal Rekursu (TR) iha antes ne’e hamutuk apoiante nain 6634. Ne’ebé sei kompleta ho total numeru ne’ebé kompleta hodi bele compete iha eleisuan Prezidensial tinan 2012 ne’e.
Tuir Laura katak, apoiantes no asinatura ne’ebé iha, tamba kandidatura Maria Céo ne’ebé aprezenta tarde iha tribunal Rekursu, maski hetan asinatura antes bá rezistu, maibé rezista ikus iha TR. Maibé ho esforsu ne’ebé iha ekipa volontariu apoia Maria Céo, sei bele kompleta numeru ne’ebé hatama iha Tribunal Rekursu atu sai kandidatura ofisial ba prezidenti Republika period tinan 2012-2017.
Reprezentante ekipa volontariu kandidatura prezidenti Republika, Maria do Çéo Lopes da Silva, ne’e hateten katak, servisu ne’ebé durante ne’e hala’o husi ekipa volontariu atu halibuar dadus no lista apoiante ne’e sai hanesan ponte ida atu apoia kandidatura Maria Céo ne’ebé rezista iha loron 1 fulan Fevereiru liu bá no hein desizuan ikus tribunal bá notifikasaun kandidatura Ofisial bá eleisaun prezidensial.
Ekipa volontariu ne’ebé fó apoia bá kandidatura Maria Céo, tamba kuinese Kandidatura Maria Céo ne’ebé hala’o aktividade no kontribuisaun ba nasaun TL ne’ebé hein deit iha debate kandidatura prezidenti mak bele haree no kuiñese diak hodi bele haree didiak hodi konttribui nasaun ne’e.
Ekipa volontariu Kandidatura Maria do Céo ne’e hateten katak, iha kandidatura Maria Céo ne’e hetan apoia mós husi organizasaun feto juven feto no mane inkliu mós organizasaun hanesan rede Feto iha Timor Leste ne’ebé fó asinatura tamba hatene no kuinese kandidatura Maria Céo.
Kandidatura Maria do Céo ne’e’e Kuñesidu mós iha Vida politika durante tinan 30 nia laran Tinan 30 Iha Politika, no agora hakarak kontribui fali bá dezenvolvimentu nasionál no hakarak sai inan bá timor oan hotu.
Kandidatura Maria Céo ne’ebé mak, baibain bolu Mana Céu servisu kleur iha Timor Aid nudar prezidente Instituisaun nune mós nudar Xefe Ezekutiva ba Timor Aid durante tinan walu nia laran.
Maria do Céo ne’ebé  Moris iha Distritu Dili, Sub-distritu Ataúro, Timor-Leste iha loron 28 fulan Jullu tinan 1957. No kaben nain, no oras ne’edadauk  iha oan feto nain rua.
Mana Céu ninia abilitasaun literária mak lisensiada iha Ciências Históricas no Polítikas Sudeste Asiátiku no Francês husi Universidade Charles Darwin – Nort and Teritory (NT) Australia iha tinan 1992.
Ninia kontribuisaun no partisipasaun ativa iha Luta ba Ukun Rasik-Aan hahú kedas nia sei klosan ho ninia servisu ba dala uluk nudar Intérprete ba Cruz Vermelha Internacional – programa apoio aihan no aimoruk ba Dadur Polítiku sira hamutuk ema nain rihun 11.000 iha Ilha Atauro.
Mana Céu, ema kreativa ida iha hakerek, iha Komunikasaun Kultural, iha Planu Estratéjiku, Logical Framework, Editora Professional no Proofreading. No Professional no esperiensiada iha área Polítika durante tinan 30 nia laran, nu’udar ativista Direitus Umanus, ne’ebé ho esperensia lubun bo’ot iha Partisipasaun luta bá ukun rasik aan no kontinua bá dezenvolvimentu povu ne’ebé hetan ona liberdade.
Maski nune’e iha tinan 2009  to’o agora servisu iha Emabaixada Austrália nudar Oficial Peskizadora Polítika. No iha tinan 2008 fulan Outubru-Dezembru, Misaun Estratéjiku no levantamentu dadus UNDP nian, Dezenvolvimentu Kapasidade Tradutores & Durubasa (Intérprete) iha Timor Leste no Suporta Administrasaun Multilingual no Kapasidade Peritas iha Dezenvolvimentu no Literasia Tetum.
Nune’e iha tinan 2007 dedika tinan tomak ida atu hakerek deit. Hahú hakerek 1º Volume of East Timor – The Unsung Heroes. Manuskritu ida mak submete tiha ona iha fulan Jullo tinan 2010 ba Públikasaun Austrália iha fatin tolu.
Planu atu hakerek Volume 10 tan, 2007 autora ba dokumentu Analytical summary of political unrest in post-independence Timor-Leste to the then Prime Minister Dr. José Ramos Horta, 2004-2006 Prezidente ba Comissão Nacional das Eleições (CNE) liliu foka iha Eleisaun Xefe Suku iha Timor-Leste.
Aliende ne’e iha tinan 2001-2008, Xefe Ezekutiva Timor Aid no Koordenadora Standarizasaun/Tetum parseria ho Instituição Nacional Linguística (INL). No iha tinan 1999-2001–Prezidente Timor Aid/ Koordenadora Programa Dezenvolvimentu Lian Tetum.
Kandidatura PR, Maria Céo, iha tinan 1998-1999, reprezentante rejional ba Autoridade Akreditasaun Nasionál ba Tradutores no Durubasa sira iha Norte Território-Australia.
Ho esperensia hirak ne’e iha tinan 1998 mana Céo, hahú hari’i Instituisaun Timor Aid. No iha tinan 1996 to’o iha tinan 1999 mana Céo, Liaison & koordenadora ba Projetus Espesiais, iha Sentru Internasionál Apoiu ba  Timor-Leste, ETISC iha Darwin Australia.
Nune’e mós iha tinan 1990 to’o tinan 1995 Kandidatura Maria Céo koordenadora Projetus ba Konsellu Nasionál da Rezisténsia Maubere (CNRM) iha Darwin Australia, Servisu hamutuk ho Dr Ramos Horta hodi apoia no suporta Rezistênsia iha Timor laran, FALINTIL, no Organizasoins ativistas Indonezia nian ba Timor-Leste iha Elsam, Solidamor, Infight no hirak seluk.
Iha tinan 1985 to’o tinan 1989 hahú atividades rezisténsia iha Austrália. Nune’e mós iha tinan 1980 to’o tinan 1983 kandidatura Céo sai hanesna Intérprete ba Cruz Vermelha Internacional (ICRC) no Supervizora ba Aihan no Aimoruk ba Prizioneiru Polítiku sira hamutuk ema nain rihun sanulu resin ida (11.000) iha Ataúro.
Kandidatura ne’e mós iha esperensia bele hakerek no koalia ho kapasidade tomak lian sira hanesan lian Tetum, Português, Inglês, Espanhol, Francês, Bahasa Indonésia. (JXN TchayM’qA)

Prezidénti eleitu tenki tau Atensaun bá Agrikultór


Kandidatura Prezidenti Republikua (PR) bá periodu tinan 2012-2017, wainhira eleitu b’a kadeira Prezidenti Repúblika tenki tau atensaun bá povu Timor Leste ne’ebé maioria iha vida agrikultor durante ne’e.
Responsavel Farming Study Group (FSG), Remegio Viera’Laka’, ne’ebé husu bá Kandidatu Presidenti Republiku RDTL katak, wainhira elleitu bá prezidneti Repúblika period tinan 2012-2017, tenki tau atensaun bá povu agrikultor sira.
“Kandidatura Prezidenti tenki toma atensaun ba komunidade maioria agrikultor sira nia direitu hodi bele sai prioridade nasionál. Ami hakarak agradese mos ba Prezidenti Repúblika tanba rekomenda FSG hanesan ONG nasionál ejisti iha Timor Leste luta ba prioridade agrikultores," heteten Remigio Laka, liu husi karta ne’ebé redasaun Diario Timor Post asesu iha Tersaa horseik.
Tuir Remigio katak, FSG ne'ebe establese iha dia 07 de marsu 2004 ate agora identifika nafatin problema agrikultores, iha obstaklu bo’ot ba nasaun RDTL ida ne'e mak oinsa bele tau as comunidade agrikultores hanesan parte ida ba solusaun pas no estabilidade ba nasaun. Tanba agrikultores mak maioria 85% hanesan vida agrikultores no depende ba nia aihan rasik.
Ho ida ne’e FSG ne'ebe hanesan foin hetan kuinesementu husi Presidenti Repúblika iha dia 06 de febreiro 2012 hanoin katak, prioridade nasionál ba dezenvolvimentu ba nasaun ida ne'e mak presija hadia prioridadde sira ne'ebe durante ne'e dala ruma FSG konsidera guvernu ne'e lakoi tau hanesan prioridade nasionál porfundu, hanesan dala ruma tau as no dala ruma hatun.
Nia dehan, iha failansu ida ne'e durante ne'e FSG identifika tuir hanesan barometru ida ne'ebe presiza hatene tuir mak OJE la tau as hanesan sai prioridade ida ne'ebe bele koloka ba agrikultores sira nia orgaun komponeti no la asleira vida moris agrikultores sira.
Tamba ne’e nia dehan, lider durante ne’e uza nia poder hodi disidi tuir sira nia hakarak de'it sem rasionalidade no tuir realidade ita nia komun maoris tuir. Tanba sei ita koalia kona ba libertasaun do povu maubere.           
“Ida ne'e iha parte oinsa maluk sira ne'ebe iha poder sira ne'e bele tau as ba prioridade nasionál hanesan, kria lei ida ba prioridade nasionál ba dezenvolvimentu agrikultores 12% husi total orsamentul jeral estadu ba agrikultores sira nia programa. Hanesan durante ne'e ami rekomenda ba publiku no xéfe Parlamentu Nasionál komisaun D ba asuntu agrikultores sira 12 % husi total OJE kada tinan,” dehan Laka.
Ho razaun katak, Agrikultores mak save ba dezenvolvimentu nasionál ba nasaun RDTL iha rai pedasuk ida ne'e. Tanba kestaun maioria. Tamba tuir observasaun  ne’ebé iha husi publiku hanesan seluk mak sei atinji kresimentu ekonomia mikro ba nasaun hanesan foin lalais ne'e iha febreiru dia 8, 2012 tuir Eis Primeiru Ministru (PM) RDTL, Mari Alkatiri, dehan 70 % kreimentu ekonomia timor leste iha rai laran mak agrikultura. Hanesan uluk iha 2007 tuir Partidu Demokratiku Repúblika Timor Leste. Osorio Mau Leki, tau as iha nia Partidu maibe la konsege hetan poder entaun labele atinji tanba la liu husi tres porsentu husi elisaun parlementar.
Lian fuan hanesnan mós Ministru Agrikultura, Mariano Assanami Sabino, hateten katak agrikultura tenki diversifika uaihira ministru ne'e halao nia knar hanesan durante ne'e halao dadaun. No iha tinan ualu ne'e FSG hanesan NGO ki'ik ida ne'ebe luta oinsa agrikultores bele sai prioridade nasionál hodi atinji kresimento ekonomi ba bele garante estabilidade nasionál liu husi povu maioria ida ne'e tanba ne'e mak tenki kria metade de OJE ba 12% hodi bele garante no hametin dezenvolveimentu Agrikultura ne'ebe durante ne'e FSG ejije. 
“Ami husu no informa ba kandidatu PR sira hodi ba aban bairua sei karik sai Presidenti RDTL ba petiode 2012-2017 tenki tau atensaun nafatin tanba tuir Planu Estrategia nasionál AMP la inklui obstaklu hirak ne'e. Karik bele adopta PEDN 2030 ne'e. Maibe hakbi'it nafatin tuir no hamri'ik husi realidade ne'e. Tanba atu dezenvolve tuir ita nia ema nia kbi'it maioria ne'e,” afirma Remigio Laka.