DÍLI—Prezidenti Komisaun Funsaun Públiku (KFP) deklara sei halo reformasaun ba funsionáriu Públiku (FP) hamutuk rihun ida atus rua (1200) resin iha tinan 2012 mai ne’e.
“Ita iha ezbosu ida iha Parlamentu Nasionál ona. Ita hein bele hetan aprovasaun iha 2012 hodi sai hanesan rezime tranzitóriu de pensaun ba funsionáriu públiku,” Prezidenti Komisaun Funsaun Públiku, Liborio Pereira iha evaluasaun ba atividade Governu ne’ebé hala’o iha Sentru Konvensaun Dili, Sesta (16/12).
Nia dehan, funsionáriu públiku ho idade 60-65 ne’ebé sei reforma ne’e barak liu mai husi parte edukasaun no saúde.
“Ita haree infermeiru barak ne’ebé tuir loloos reforma ona, maibé lei seidauk iha. Nune’e mós profesór sira,” nia dehan.
Liborio haktuir Komisaun Funsaun Públiku hamutuk ho Ministériu Solidaridade Sosiál intrega ona ba Konsellu Ministru no hetan ona aprovasaun no haruka ona ba Parlamentu Nasionál.
Nia esplika, tuir administrasaun ne’ebé maka iha, wainhira aprova lei pensaun ida ba funsaun públiku, instituisaun seluk bele adapta inklui instituisaun Falintil-Forsa Defeza Timor Leste (F-FDTL) no Polísia Nasionál Timor Leste (PNTL),
Entretantu, Vise Prezidenti Komisaun A Parlamentu Nasionál ba assuntu Justisa, Konstitusionál no Poder Lokál, Rui Meneses via telefone hateten lei reforma ba funsionáriu públiku iha ona Komisuan A no C.
Tuir planu, nia hateten, komisaun sei halo audiénsia públiku ka semináriu ida kona-ba lei ne’e atu hetan opiniaun husi organizasaun internasionál. Nia hatutanlei reforma ne’e sei haree ba iha tinan 2012 tamba iha lei barak ne’ebé sei pendenti hela iha Parlamentu Nasionál hanesna lei rai nian no lei reparasaun ba vítima sira.
Funsionáriu Tenke Hatudu Étika
Prezidenti Komisaun Funsaun Públiku Liborio Pereira hateten funsionárius públikus hotu ne’ebé servisu iha administrasaun públiku tenke hatudu étika no profesionalizmu ne’ebé di’ak atu bele manán konfiansa povu.
“Iha atendementu públiku, funsionáriu sira tenke hatudu sira nia hahalok ne’ebé di’ak ho profesionalizmu nune’e servisu ne’ebé ita presta ba ita nia povu ne’e la’o ho di’ak,’’nia dehan iha Sesta horisehik.
Inkontru nasionál ne’ebé hala’o iha Sentru Konvensaun Díli ne’e hamutuk ho diretores jerál kada ministériu ho objetivu atu hatene kona-ba oinsá sira nia lala’ok servisu. Tema husi inkontru ne’e maka: “Étika no Profesionalizmu iha Funsaun Públiku’’.
Inkontru nasionál ne’e partisipa husi Primeiru Ministru Kay rala Xanana Gusmão, administradór distritu 13, diretores jerais ministériu sira.
Tidak ada komentar:
Posting Komentar