Dívidas Ministérius U$54.1 Millaun

*Tinan oin Laiha Kontijénsia

DÍLI—Ministériu hamutuk neen iha dívidas hahú husi tinan 2008-2011 ho total hamutuk U$ 54.1 millaun.

Dívidas husi inistériu Infra-estrutura U$ 33,522,414, Ministériu Seguransa Defeza liu-liu ba Polísia Nasionál Timor Leste (PNTL) U$ 2,583,078, Falintil-Forsa defeza Timor Leste (F-FDTL) U$ 3,331,55,37, Ministériu Agrikultura no Peskas (MAP) U$ 81,219, Ministériu Edukasaun (ME) U$ 354,514,8, Ministériu Saude (MS) U$ 14,087,135 no Ministériu Turismu Comersiu no Indústria (MTCI) U$ 140,000.

Dívidas ne’e fó sai liu husi avaliasaun ba ezekusaun orsamentu ne’ebé hala’o husi Primeiru Minstru Xanana Gusmão ba Ministériu hotu-hotu iha salaun enkontru Ministériu Finansas, Kinta (15/12).

Tamba ne’e, Primeiru Ministru (PM) Xanana Gusmão hateten dívidas husi Ministériu sira ne’ebé hahú husi tinan 2008 to’o iha tinan 2011 ne’e sai bo’ot liu. Tamba ne’e, nia dehan, tinan 2012 laiha ona orsamnetu ba kontijénsia atu halo dívidas ne’e.

Xefi Governu ne’e lamenta ho situasaun dívidas ne’ebé akontese iha Ministériu ne’en. Ne’eduni, Xanana husu ba funsionáriu públiku tenki hatene lei orsamentál atu nune’e bele hametin Estadu ne’e ba oin.

“Sé imi kompriende hotu regras no hatene regras sira hodi la’o, ne’e Governu bele troka fulan-fulan maibé Estadu la’o nafatin tamba imi mak forsa,” Xefe Ezekutivu tenik.

Iha fatin hanesan, Vise Ministru Finansas (VMF), Rui Hanjam katak aleinde avalia kona-ba dívidas, sira mós halo avaliasaun ba mudansa ba orsamentu husi kategoria ba kategoria no iha mós kestaun transferénsia no kontijénsia.

“Dívidas ne’e, ohin PM Xanana lamenta teb-tebes tamba jestaun kada liña ministeriais ne’ebé maka to’o agora iha prosesu ne’ebé dala ruma halo tiha kompras maka foin hatama CPV (kuitansi). Ida ne’e hanesna kestaun ida ne’ebé intermus de jestaun labele akontese,” Hanjan esplika.

Tuir nia dívidas ne’ebé iha ne’e, husi Ministériu Infra-estrutura maka bo’ot liu kompara ho ministériu sira seluk ne’ebé maka iha mós dívidas.

Tuir planu, iha fulan Janeiru tinan 2012, Primeiru Ministru sei vizita liña ministeriál atu haree jestaun kada ministériu nian.