Ema Deskoñesidu Tenta Harahun STAE

Edifísiu Sekretariadu Tékniku Administrasaun Eleitorál (STAE) iha Segunda (20/2) tuku 01:00 madrugada hetan atake husi ema deskoñesidu ne’ebé tenta atu harahun edifísiu STAE ho bomba marotok. Akontesementu, ne’e la rezulta estragus no vítima.

Tuir fonte konfirmadu iha STAE hateten katak akontesementu ne’e akontese iha tuku ida kalan, iha ema deskoñesidu ho motor rua maka soe marotok tama mai edifísiu laran ne’ebé monu los iha baranda oin no rabenta kedas iha fatin.

Fontes ne’e mós haktuir iha momentu kalan ne’e iha de’it Polísia Espesiál husi Polísia Nasionál Timor-Leste nain rua no seguransa sivíl na’in ida maka halo seguransa ba edifísiu STAE.

Ho akontesementu ne’e, Polísia sira tenta duni tuir ema deskoñesidu sira ne’e maibé ema sira ne’e ho motor halai lakon. Polísia sira husi investigasaun kriminál nian mai foti ona dadus no halo hela investigasaun ba akontesementu ne’e.

Tomas Cabral, diretór STAE hateten akontesementu hanesan ne’e la’os foin foin primeiraves akontese iha edifísiu STAE maibé dala rua ona. Iha 2007 mós akontese no funsionáriu STAE ida husi Lospalos  mós hetan sona iha momentu ne’ebé atu halo eleisaun.

Diretór STAE mós preokupa kona-ba seguransa. Tuir nia, seguransa iha ona maibé ema sei bele mai ataka.   

Tamba ne’e, nia husu ba kandidatu prezidenti repúblika sira atu oinsá ko’alia ho polísia no Estadu tamba baze de dadus kompletu hotu ona iha STAE nasionál. Tamba ne’e,  sé kuandu ahi han edifísiu STAE maka eleisoens sei la la’o.

“Iha ne’e baze de dadus kompletu hotu ona maibé kuandu ahi han edifísiu ne’e maka ita sei labele halo eleisaun tamba iha ne’e iha polísia mós ema sei barani mai,’’ Cabral hateten.

Nia hateten tan katak, sé husi 13 distritu maka ema barullu hotu maka eleisoens ne’e labele la’o tamba urnas sira ne’ebé mai ne’e husi Finlandia. Urnas hirak ne’e han fulan tolu maka foin to’o iha Timor no ekipamentus 90% iha distritu hotu ona.

Entretantu, Germenino Lekisera, koordenadór ekipa vitória Kandidatu Prezidenti Taur Matan Ruak hateten ema ne’ebé halo hahalok krime ida ne’e konsidera hanesan milísia tamba tenta atu harahun festa demokrásia ne’ebé agora la’o iha Timor Leste.

“Kuandu akontese maka kaer ho liman, maka lori ba oho tiha iha Merkadu ne’ebá. Laiha lei ida maka husu tamba nia traidór,” Lekisera realsa.

Nia preokupa ho seguransa rai laran katak tamba saida maka akontese ne’e mosu? Karik lei maka la forte ka nai ulun sira maka la hatene implementa lei karik.

“Kuaze prezidenti ko’alia maka paz, paz no paz maibé ema bomba malu iha li’ur nafatin. CNE halo kultura oho fahi, oho manu, haree fahi nia urat maibé sai mai li’ur ema oho malu nafatin,” Lekisera haktuir.

Tamba ne’e, nia parte husu ba Estadu atu tau seguransa iha fatin hotu iha Timor-Leste.

Portantu, akontesementu soe marotok ne’e la’os akontese de’it iha STAE nasionál maibé akontese mós iha edifísiu Komisaun Nasionál Elisoens (CNE) no mós iha Bairu Formosa ne’ebé iha kareta Unpol nian ida ahi han.