Língua Materna La’os Atu Destroi

Primeiru Ministru (PM) Xanana Gusmão hateten lian materna atu ajuda estudante husi klase primeiru to’o iha klase 4 hodi bele aprende lalais liu la’os atu destroi Lian sira iha nasuan laran.

“Ida ne’e la’os ita atu destroi (estraga) maibé atu ajuda labarik sira bele hatene absolve, hodi nunee sira komunika ba malu halo nusa, professor komunika ba alunu halo nusa no wainhira bá uma sira le’e no iha ne’ebá sira nia família mós bele kompriende saida maka sira aprende,” Xanana esplika.

PM hato’o kestaun ne’e hodi hatán ba preokupasaun husi deputadus parlamentár Frente Revolusionáriu Timor-Leste Independente (FRETILIN) iha debate urjénsia ho Ministériu Edukasaun kona-ba lian materna iha Parlamentu Nasionál, Kuarta (08/2).

Tuir survey, Xanana esplika, di’ak liu labarik sira aprende lee ho sira nia lian para depois pasajen ba tetun no ba portugués. “Ida ne’e maka ami aprezenta ba povu no mukit nia oan sira,” nia hatutan.

Maibé, Deputadu Bankada FRETILIN, Estanislao Aleixo da Silva katak edukasaun la’os tamba lian materna, maibé edukasaun tamba kualidade profesores, kualidade ensinu no situasaun povu nia moris no fasilidade eskola.

“La’os lian materna maka atu rezolve edukasaun. Lian refere iha fatin barak falla ona. Ita nia prezidente mós hateten katak lian ne’e iha rai barak falla, maibé ita hakarak ba oin loron ruma ita sei falla no ita sei monu,” Estanislao hateten.

Fasilita Esnsinu Báziku

Iha biban ne’e, Xanana mós hateten lian materna sei uza hodi fasilita ensinu báziku ba iha literasia ho numerasia.

“Lian materna ne’e atu ajuda labarik sira iha eskola atu bele aprende numerasia to’o hotu no to’o bá iha literasia atu lee di’ak liu ho lian materna. Tamba ida ne’e akontese iha mundu tomak hanesan hanesan Ázia, Áfrika no nasaun sira seluk,” nia subliña.