Taur: Nasaun Labele Maupagadór

KAPREZ Taur Matan Ruak husu ba Estadu atu tau matan ba povu ne’ebé uluk kontribui ba luta libertasaun ba nasaun ida ne’e. Ne’eduni, nasaun labele sai maupagadór .

“Ita nia juventude sira barak maka lakon sira nia eskola tamba de’it nasaun ida ne’e. Ohin loron sira buka servisu la hetan tamba sira la hatene malae nia lian. Tamba ne’e, Estadu iha obrigasaun no dever tau matan ba sira,” Taur hato’o lia hirak ne’e liu husi konsolidadasaun ba ninia apoiantes sira iha Aldeia Mota Ulun, Suku Becora, Sub-Distritu Kristu Rei, Kuarta (08/02), relasiona ho veteranus, faluk no oan ki’ak sira ne’ebé to’o ohin loron sai padese tamba nasaun ida ne’e.

Eis Majór Jenerál hatutan, joventude sira lakon eskola la’os tamba uluk ba halo to’os ho natar de’it, maibé sira lakon eskola no tempu tamba de’it nasaun ida ne’e.

“Tamba ne’e, hahú agora ita hotu tenki servisu maka’as atu nune’e lei ne’ebé la serve iha ita nia rain ita tenki muda. Portantu, sistema atu muda oinsá ne’e problema seluk ida,”  Taur tenik.

Kandidatu Prezidente Repúblika hakarak governasaun ida ne’e tenki iha tranzisaun atu nune’e tinan 10 ba oin tenki kaer rasik kuda talin. Nia husu atu hahú agora tenki esforsa-an maka’as para bele halo loron aban sai di’ak liu fali loron ida ohin.

Lansa Website

 Entretantu, Taur Matan Ruak iha Kuarta horisehik ofisialmente lansa ona ninia website ba públiku. Website ho dirasaun www.tmr2012.org/ hanesan meius ida hodi hakat ba vitória iha eleisaun prezidensiál loron 17 Marsu.

Website ne’e asesu to’o ba internasional no bele simu hanoin husi ema seluk ba kandidatura Taur Matan Ruak no akompaña planu no mehi di’ak husi kandidatu Taur.

Taur  iha okaziaun ne’e promete katak, buat hotu ne’ebé iha ninia klamar, nia sei tau iha website ne’e hodi bele dezenvolve nasaun Timor-Leste.

“Ha’u tau iha ne’ebá, ita bo’ot sira bele koñese liu ha’u no bele lori ita ba hanoin ida de’it, lori Timor Leste ba oin no manán tan dala ida hanesan uluk ita manán,” nia esplika.

Taur Matan Ruak ofisialmente rejista ninia kandidatura iha Tribunál Rekursu iha fulan Janieru liu-ba.