Veteranus Prontu ‘Funu’ Hasoru Armadus Ilegais

Eis Komandante Forsa Armada Libertasaun Nasional Timor Leste (FALINTIL) veteranu Corneilo Gama ‘L7’ hateten katak, Veteranus prontu funu hasoru armadus ilegais, tamba veteranus lakohi povu atu terus tan iha ukun an nia laran.

Cornelio Gama ‘L7’ ba Jornalista Jornal Nacional Diário Kuarta-Feira (26/5)iha parlamentu nasional, wainhira hatan konaba grupo ilegais balu ho kilat nebe tiru malu ho Polisia Nasional Timor Leste iha Distritu Ermera, Domingo 16/5 liu ba.

Eis komandante FALINTIL ne’e informa katak, veretanus anivel Nasional Timor Leste ba joves no populasaun Timor Leste, nain ulun sira katak povu ne’e terus dala ida, liberta nasaun dala ida mak Timor Leste agora dadauk ukun an.

“Se mak hakarak atu liberta tan, oinsa atu liberta, saida mak ladiak atu liberta sira koko mak ami haree,”dehan Cornelio ‘L7’.

Nia hatutan katak, Uluk sira funu mate kanek lakon familis, sira mak terus no mak lakon mas kuandu diak Timor Leste laran tomak nian.

“Buat ukun an mak ladiak sira halo tan sira halai sira nia fen oan sira ami sei rabat hotu, ne’e ami oho ami sei suzila uniku solusaun, tamba ami terus dala ida tiha ona tinan 24, mas ida halo tan hanesan ne’e,”dehan Cornelio ho lian makas.

Nia deklara katak, se mak foti kilat Veteranus fó atensaun ba sira hanesan ne’e, labele halimar vida povu ho nasaun no labele halo povu terus iha tinan 24 mate barak no terus nune’e ona keta halo povu terus tan hanesan uluk.

“Nia bele lori kainau morteiru, bazuka asaltu FALINTIL veteranus prontu atu reaze kontra ema ne’ebé lori kila ilegal, ami taka fronteira sei buka ate to’o rai kidun ami sei hetan hotu para ami la kohi povu atu terus tan,” nia hateten ho lian ne’ebé makas.

Eis komandante ne’e mos husu ba Populasaun sira atu matan moris neon ain, tamba lakohi atu mate, terus halai tunsae.

“Semak hetan ema ne’ebé subar kilat informa mai ami propriu veteranus prontu atu ba buka sira atu kaer sira,”tenik Cornelio Gama ‘L7’.

Iha sorin seluk xefi komisaun B ne’ebé trata ba asuntu Negosiu Estrangeiru, Defeza i Seguransa Nasional, Duarte Nunes dehan katak, kilat ilega ne’ebé sei espailha iha liur, tamba uluk krize ema foti sai agora rekola fila fali, maibe kila hira ne’e Polisia Nasional Timor Leste (PNTL) mak hatene.

“Uluk krize ne’e mosu kilat iha liu ne’e iha Governu mos hatene, maibe intelegensia mak ba buka, tamba ida ne’e susar atu hetan,” dehan Duarte.

Maski iha tinan tolu nia laran ona mas seidauk identifika hotu kilat ilegal ne’ebé sei espaila iha liur ne’e deputadu Duarte hatete, ema ne’ebé subar kilat ne’e la hatene, nune’e atu buka iha ne’ebé.

“Buat ne’e la’os tau deit iha ne’eba para ba foti, maibe ema ne’e subar ho intensaun ne’ebé iha,”katak nia.

Nia afirma, ema ne’ebé subar kilat ne’e la’os sidadaun Timor ne’ebé la iha konsiensia ba nasaun Timor Leste ne’e.

“Se hakarak moris iha ne’e povu ne’e terus liu ona, agora ita hakarak subar kilat ne’e hatauk tan ema ba halo saida, ida ne’e mak la iha konsiensia la iha duni konsiensia,”realsa Durte.

Tamba ne’e prezidenti komisaun ne’e husu atu Timor oan hotu kontribui fó informasaun no husu atu la lika tauk.