TL-RI Tenki Rezolve Kazu Oe-Cusse

Prezidenti komisaun B Parlamentu Nasionál ne’ebé trata asuntu Negosiu Estrangeiru, Defeza i Seguransa Nasional, deputadu Duarte Nunes hatete , Governu Timor Leste ho Repúblika Indonesia (RI) tenki tur hamutuk hodi rezolve kazu membru Tentara Nasional Indonesia (TNI) ne’ebé tama mai iha area Naftuka Sub-distritu Nitibi, Distritu Oe-Cusse, hodi baku rahun uma sosiál Timor Leste, foin lalais ne’e.

Duarte Nunes ba Jornalista Jornal Nacional Diário, wainhira hatan kona-ba Memru TNI ne’ebé baku rahun una sosial Timor Leste nia iha Distrito Oe-Cusse, Sesta-Feira (4/6).

Prezidenti komisaun B ne’e hatete tamba iha ona komisaun konjunta ne’ebé mak Governu rua hari hodi tur hamutuk rejolve problema ruma mak akontese iha fronteira, tamba problema fronteira seidauk deside lolos.

“Komisaun ne’e mak sempre tur hamutuk kuandu iha problema sira rejolve, iha problema lina fronteira laos ita mak sansaun, tur hamutuk hodi fo hanoin ba departamentu ne’ebé iha knar atu asuntu refere, nemak sei halo prosesu ne’e ba oin,”dehan Duarte

Nia dehan problema iha lina fronteira ne’e iha situasaun ne’eb’e dilematiku ituan tamba frosa sia ne’ebé mak mai estraga uma sira ne’e hamutuk ho ema Timor oan ne’ebé mak agora sai ona sidadaun indonézia.

“Frosa sira ne’e hamutuk ho ema Timor oan ne’ebé uluk halai tiha ba sorin, timór oan sira nemak hela iha liña fronterista ne’e,”dehan Duarte.

Nia hatutan, problema ne’e mosu tamba interese grupu Timor oan sira ne’ebé mak agora moris Indonezia tamba sira sente katak sira sei iha direitu ba rai TL, maibe la signifika katak Indonezia sei mai invade tan TL.

“Ha’u hanoin indonézia mos la hanoin atu mai invade tan ita dala, maibe Oinsá ita manpu atu rejolve problema ne’e ka lae,”katak Duarte.

Tuir informasaun ne’ebé diario ne’e rekolla, membru TNI nain 28 ne’ebé husi postu Oe-poli Kupang no tama ilegalmente mai iha area Naftuka Sub-distritu Nitibi kompletu ho armas.

Relasiona ho problema refere Sekretario Estadu Regiaun Oe-Cusse, Jorge da Conceção Teme husu ba Ministerio Negosio Estranjeiru (MNE) atu kontinua hala’o negosiasaun hodi rejolve problema demarkasaun ne’ebé sei falta pursentu Tolu (3%).

Tuir Jorge Teme katak problema ne’e akontese tamba negosiasaun demarkasaun entre Timor Leste ho nasaun Repúblika Indonesia ne’ebé la’o tarde ne’ebé mak hamosu akontesemntu sira hanesan ne’e.