Implementa PPR La Iha Kualiddade,

Lasama Apoiu Governu ‘Black List'
Prezidenti Parlamentu Nasionál Fernando de Araújo ‘Lasama’ apoiu Governu liu husi Sekretariu Estadu Óbras Públika (SEOP) atu black list ba kompañia 15 ne’ebé identifika implementa Projectu Pakote Referendum (PPR) ho laiha kualidade.

“Ne’e ha’u dukung sen pursentu (100%), atu kompañia ne’ebé halo servisu lalós ne’e black list,” hateten Prezidenti Parlamentu Nasionál Fernando ‘Lasama’ ba Joarnal Nacional Diário foin lalais ne’e iha Parlamentu Nasionál.

Lasama mós husu Governu tenki haree kompañia sira ne’ebé tau naran, tamba kompañia ne’ebé tau naran aman nian, maibé black list (lista metan, red) naran ne’e muda fali ba inan ne’ebé hanesan inan mós black list muda fali ba oan.

“Ha’u husu ba governu atu kompañia ne’ebé ba tau naran ne’e, sé kompañia ne’e aman nia naran mak iha ne’ebá, tau mós naran fen ho oan, sébele tau mós subrinho ne’ebé hela iha hamutuk iha ne’eba para Black List hotu, labele aman Black List muda fali naran deit, mas oan mai ho atitudi hanesan nafatin ne’e lalós,” Lasama informa.

Antes ne’e Sekretariu Estadu Óbras Públika Domingos Caeiro fó sai iha média nasionais deklara katak, rezultadu inspeksaun ekipa task force SEOP nian identifika kompañia 15 ameasadu black list tamba implementa PPR laiha kualidade.

Kompañia 15 kompostu husi PPR ne’ebé mak hala’o iha distritu 13. Kompañia sira ne’e tuir Sekretariu Estadu, hala’o projectu balun foin mak atinji to’o 30-40 porsentu, ne’ebé konsidera seidauk to’o iha standar ne’ebé Governu presiza.

Ideia ba programa PPR ne’e mai husi Primeiru Ministru (PM) Kay Rala Xanana Gusmão ne’ebé hahú aplika iha fulan Setembru 2009, ho intensaun fó osan ba kompañia lokal sira hanesan insentivu ida atu partisipa iha dezenvolvimentu nasionál.

Programa PPR ne’e nia tempu implementasaun ne’ebé mak determinadu iha fulan tolu nia laran, katak Outubru, Novembru no Dezembru. Maibé ho kondisoens no problemas tempu udan nune’e Primeiru Ministru fó toleránsia aumenta tan fulan ida. Maibé fulan Janeiru remata no to’o ona Maiu nia rohan 2010 maibé seidauk iha relatoriu konaba implementasaun PPR nian ne’ebé mak Governu publika.