Opozisaun Konsidera

Governu AMP La Fiar Sistema Rasik
Bankada partidu FRETILIN nudar opozisaun iha Parlamentu Nasionál (PN) konsidera katak, Governu Aliansa Maioria Parlamentar (AMP) la fiar nia sistema rasik, tamba Governu AMP rasik mak hari’i sistema Aprovizionamentu, maibe Vice Primeru Ministru (PM) ba asuntu Gestaun no Administrasaun Estadu ne’ebé Mario Viegas Carrascalão ne’ebé hatete, aprovizionamento fatin ema hetan oportunidade halo korupsaun.
“
Sistema ne’ebé ita hari’i, ita rasik la konfian ne’e inkapasidade Governu nian rasik, se ita rasik hola parte iha Governu ne’e ita rasik la konfia intende sistema i sistema aprovizionamenti iha ne’eba hamósu korupsaun barak ne’e hatudu katak ita rasik inkapasidade, tamba sistema ita hari’i atu labele fó oportunidade buat sira hanesan ne’e,” hatete Francisco Miranda Branco ba Joarnalista Jornal Nacional Diário foin lalais ne’e iha Parlamentu Nasionál.

Nia dehan katak, wainhira Governu rasik hari’i sistema no la fiar ba sistema ne’ebé sira rasik hari’i, hatudu katak, Governu AMP la iha kapasidade atu ukun tamba ne’e deklarasaun mai husi Vice PM.

Deputadu Partidu Frenti Revúlusionario Timor Leste Independenti (FRETILIN) Nia hatutan, Nia (VPM) hanesan ema ne’ebé responsavel numeru 20 iha Governu AMP nian laran.

“Sistema ne’e sira rasik mak hari’i, maibe nia rasik hanesan memnru Governu i tuir hirarkia estrutura Governu nia mak responsavel numeru segundu (20)iha ezekutivu agora dadauk ne’e,”katak Francisco.

Nia mós salienta katak, hahalok hanesan ne’e hatudu katak Governu AMP la iha kapasidade dunu, tamba hari’i sistema maibe la fiar fali sisstema.

“Ami kleur tebes ona hare katak, akontese barak duni iha ita nia sistema aprovezionamentu,”dehan Francosco.

Deputadu ne’e dehan, tuir kapasidade opozisaun defaktu iha parlamentu sempre hakilar hodi fó kontribuisaun para hotu bele hadia sistema ne’e diak para osan povu nian bele implementa didiak tuir prosedimentu ne’ebé iha atu osan ne’e ba objetivu lolos desenvolvimentu povu ninia.

Iha sorin seluk deputadu husi bakada parlamentar partidu Congresu Nacional Reconstrução Timor Leste (CNRT) nudar mós membru komisaun C ne’ebé trata asutu anti korupsaun Maria Teresinha Viegas hatete katak,Vice PM hasai esteitmentu dehan katak aprovizionamentu fatin ema atu halo korupsaun, tamba Vice PM Carrascalão iha indikasaun ruma i antes Komisaun Anti Korupsaun (KAK) hamrik VPM mak superviziona direita servisus iha aprovezionamentu iha Ministeriu Finansan nia okos.

“Ha’u hanoin nia bele iha indikasaun ruma mak nia f’o sai esteimentu hanesan ne’e, se la iha indikasaun, ha’u hanoin nia la fó sai esteimentu hanesan ne’e,”dehan Teresinha.

Tamba ne’e nia hatete katak komisaun C iha poder tomak atu halo Fiskalizasaun se karik iha keisas ka iha regularidade mósu iha prosesu tender ne’ebé aprovezionamentu halo ne’ebé la los.
“Ha’u hanoin VPM fó sai naran diak liu ida ne’e bele enkonjuntu komisaun C Parlamentu Nasionál, KAK bele servisu hamutuk hare prosesu ne’e,”katak nia.

Nia salienta katak se iha indikasaun no evidensia ne’ebé forte VPM bele rekomenda ba Ispektur Geral, bele mós enkaminha ba Provedoria Direuts Humanus i Justisa (PDHJ) ou KAK depois halo investigasaun.

“Ha’u fiar katak VPM há sai esteimentu hanesan ne’e, tamba nia iha evidensia, nia hatene prosesu balu ne’ebé la’ao ladun transparensia ne’e mak nia fó sai, ha’u la fiar katak inposivel VPM atu fó esteimentu arbiru ne’e lae,”nia dehan.