ME Hirus Filipe de Jesus Informasaun Ba Publiku
Ministru Edukasaun, João Cancio Fretias hirus Inspetur Eskola Distrito Bobonaro Filipe de Jesus tamba koalia sai fali ba publiku konaba eskola kuaze 30 nebe durante fulan rua ona merenda eskolar lalao iha sub-Distritu Bobonaro.
“Buat ne’ebé Sr Filipe de Jesus fo sai buat ne’ebé mak los katak merenda eskolar ne’e komesa iha fulan Abril ho Maiu ne’e la mai, entaun ida ne’e Ministru rona katak, Sr. Inspektur eskola ne’e fo sai ona ba publiku, maibe Ministru rasik hirus inspektur ne’e katak labele fó sai problema hanesan ne’e ba iha publiku,”hatete Mateus de Jesus deputadu independenti Segunda-Feira (31/5) iha Palamentu Nasional.
Tuir deputadu ne’e katak, Ministru halo hanesan ne’e impede ema seluk nia direitu, atu fó hatene ba iha publiku ka governu konaba povu ninia nesesidade ne’ebé iha, akontesimentu hanesane lolos labele akontese.
“Se fulan rua tiha ona mak merenda eskolar paradu entaun ita haree katak labarik sira nia direitu lori ba iha ne’ebé, tamba labarik sira falta merenda eskolar iha fulan rua ne’e la’os buat oituan, se ita kali ba estudante sira ne’ebé eskola ba fulan rua nia ne’e hira,” nia husu.
Iha Fatin hanesan Vice Prezidenti Komisaun F ne’ebé trata ba Asuntu Saude, Edukasaun i Kultura, Francisco Jeronimo afirma, iha parte diresaun regional ninian ne’ebé foti kestaun konaba problema merenda eskolar ne’ebé foti ne’e depois hetan amiasa husi Ministru Edukasaun, i Kazu ne’e kuaze akontese iha Timor Laran tomak.
“Ha’u hanoin kazu ida hanesan ne’e la’os foin mak akontese, maibe Ministru halo dala barak ona ba ninia ema sira iha ne’eba, premeiru tempo ami hetan surat despaisu ida hatete katak buat hotu-hotu relasiona ho edukasaun nian la iha funsionario ida atu koalia ba publiku, so diresaun mak bele rezolve, hanesan Ministru mak bele hatan restu ne’e nonok,”katak Jeronimo.
Tuir Francisco Jeronimo katak, hahalok ne’e hamosu abuzu, uza poder taka dalan ba buat ne’ebé akontese ladiak iha eskola sira.
“Ita nia funsionario hetan buat ruma ne’ebé mak sira hatene sira tenki fó sai para ema hotu hatene buat problema sira ne’e, tamba sira koalia ne’e ha’u hanoin lolos ne’e hanesan imput ida ba ME atu hare hodi rezolve la’os amiansa fali ema sira ne’e,”dehan nia.
Nia kosidera katak, hahalok Ministru Edukasaun ne’e abuzu depoder, tamba la iha lei mak regula hanesan ne’e, maibe lei hatete buat balu se funsionariu sira la disiplina, trata tuir regra disiplinar nian, maibe buat ne’ebé mak sira koalia los tamba saida mak ME tauk atu loke ba publiku.
“Ita lalika tauk i lalika ameasa malu, duke ita ameansa malu sai problema ba bebeik, la rezolve entaun buat sira ne’e lala’o,” informa Jeronimo.
Tidak ada komentar:
Posting Komentar