TTD Fó Deadline,

Deputadu Paulo Martins ‘Dilema’
Tribunal Distrital Dili (TTD) fó deadline loron lima nia laran ba deputadu Paulo de Fatima Martins atu fó sasin konaba kazu atakes rezidensia Komandante F-FDTL Brigadeiru Jenerál aktual Maijor Jenerál Taur Matan Ruak iha 25 Maiu 2006. Maibé eis komandante Jerál PNTL aktual deputadu bankada CNRT ne’e sente dilemátiku tamba to’o agora seidauk simu perguntas husi Tribunal.

“To’o agora ha’u seidauk simu pergunta sira ne’ebé atu resposta ho por eskrita ne’e,” hateten deputadu Paulo Fatima Martins ba Jornal Nacional Diário wainhira husu konaba ninia disponibilidade atu fó sasin ba tribunal ho hakerek tuir deadline Tribunal nian.

Deputadu husi bankada Partidu Congresu Nacional Reconstrução Timor Leste (CNRT) ne’e esplika katak, to’o oras ne’e dadaun nia parte sei hein hela perguntas husi tribunál.

“Há’u lahatene to’o agora ne’e husi parlamentu mak seidauk haruka surat ne’e ba ka tribunál mak seidauk haruka mai iha Parlamentu. Tamba perguntas ne’e tenki fó tempu para ha’u responde. Pergunta ne’e la’os atu fó deadline loron lima, tamba perguntas ne’e ha’u iha posibilidade atu responde iha loron lima nia laran ka lae tenki fó ha’u asedensia,” dehan deputadu Paulo Martins.

Nune’e mós Prezidenti Parlamentu Nasionál Fernando de Araújo ‘Lasama’, hateten katak iha tribunal dehan Deputadu Paulo Martins atu hato’o nia testamuña ho eskrita.

“Sé eskrita ne’e seidauk to’o iha ne’ebá (tribunál, red) ne’e problema Senhor Deputadu Paulo Martins ninia, prepara ona resposta ba pergunta ne’ebé tribunal hato’o ka lae,”dehan Lasama.

Tamba ne’e Xefi Órgaun Lejislativu ne’e dehan, husi Parlamentu tuir ona prosedimentu rejimental ne’ebé mak iha.

Prezidenti Parlamentu Nasionál ne’e hatutan, Parlamentu autoriza ona atu deputadu Paulo Martins atu ba fó nia deklarasaun, ne’ebé hakerek klaru katak rekomendasaun husi komisaun I Parlamentu Nasionál ne’ebé trata asuntu Regulasaun Interna Étika I Mandatu dos Deputadus.

No aleinda ne’e tenik Prezidenti Parlamentu Nasionál, deputadu Paulo Fatima Martins mós dehan prontu atu fó testamuña iha tribunál.