Valor La too 2,5

Governu Hapara Bolsu Estudu Ba Estudante 13 Iha Indonesia

Governu liu husi Sekretaria Estadu Rekursu Naturais hapara bolsu ba estudante 13 nebe estuda iha area minarai nian iha Universidade Prawijaya Malang - Indonesia tamba estuda iha semester balu, ninia valor estudu la too 2,5.

Alfredo Pires ba Jornalista Jornal Nacional Diário, hafoin hasoru malu ho komisaun D ne’ebé trata asuntu Agrikultura, Pescas, Florestas Rekursu Naturais i Ambiente iha Parlamentu Nasionál (PN) Tersa-Feira (15/6).

“Konkretamente sanulu resin tolu ke para, ne’e iha Indonesia nian liu-liu iha universidade UPM, mas ita iha 150 estudantes bolsu estudu,” dehan Alfredo.

Tuir SERN katak, iha duni estudante balu ne’ebé la konsege hetan markas diak, no ba sira ne’ebé la konsege hetan markas diak, sira ne’ebé inves ba estuda ba fali ransu tunsae fali lori osan estadu nian.

Tamba ne’e Alfredo Pires haktuir, uluk estudande sira ba ne’e regras dehan ona se involve iha buat krime, automatiku para, tamba la’os ba estuda deit, maibe iha embaixador nian hotu ne’ebé halo buat ruma iha kampus kona Timor Leste hotu.

“Rekursu naturais iha politika ne’e klaru, ita sei haree kazu ba kazu, mas enjeral se deit mak iha Universidade UPM ne’ebé valor la to’o 2,5 semester ida ka semester dua entaun Governu para sira nia bolsu estudus,” hateten SERNPires.

Nia hatutan katak, enjeral se estudante ladun pozitivu, tuir akordu ne’ebé Governu halo ho inan aman bolsu estudu sira, katak bolsu estudu sira ne’ebé valor la to’o 2,5 iha primeiru semester ka segundo sei para.

“Rekursu Naturais sempre tur bebeik ho inan aman atu ita troka ermpresaun ba malu, enjeral inan ama mos simu 2,5, se sira nia oan rasik la konsege ita hapara. Atu ita buka fatin ba seluk ne’ebé prontu atu dedika na ba estudu ne’e ba ita hotu no semak lakon oportunidade iha rekursu naturais ka iha Governu sei la hetan tan,” dehan Pires.

Alfredo Pires informa, antes atu hapara estudante bolsu estudu Sekretariu Estadu Rekursu Naturais mós koalia ho inan aman bolsu estuddu, no dehan ba inan ama katak, atu hapara sira nia oan, no inan aman sira konkorda tuir regras.

“Regras ne’e ami hari’i ho inan aman, ne’ebé la’os ami mak hari’i mesak deit, maibe hetan konkordansia husi inan aman rasik ba valor ne’e, maibe mós inan aman balu triste, mas ita labele fó oportunidade barak tamba setor minarai ne’e ita presiza Timor-oan ne’ebé matenek mak iha ne’eba,”nia esplika.

Nia dehan, Governu aviza no koalia ho estudante bolsu estudu sira inan aman se mak hakarak fila Governu bele selu nia bilete atu fila mai Timor Leste.

“Sira ne’ebé ita hapara ita la’os haruka sira fila fali, mas se inan aman iha osan atu aguenta sira, mas antes hapara husi parte estadu ne’e ita fó anunsiu didiak i hakerek karta ba sira, ami fó oportunidade semester ida se mak la konsege ami para,” nia dehan.

Aleinde ne’e Sekretariu Estadu Rekursu Naturais mós informa katak, maski iha estudante bolsu estudu ne’ebé Governu hapara tamba la tuir regras ne’ebé determina, Maibe iha mós estudante Timor-oan ne’ebé estuda iha nasaun hanesan Estadus Unidus Amerika (EUA) ne’ebé hetan valor diak no iha nasaun Norvegia ne’ebé valor as liu estudante iha Norvegia tomak.