PUN- FRETILIN Eziji PN

Ajenda Alterasaun Lei Pensaun Vitalisia

Bankada Parlamentar partidu Frente Revulisionari Timor Leste (FRETILIN) ho Partidu PUN eziji ba meza Parlamentu Nasional (PN) atu ajenda alterasaun kona ba lei pensaun vitalisia, atu nune’e bele debate iha plenaria.

Xefi bankada partidu FRETILIN Aniceto Guterres ho Xefi bankada parlamentar Partidu Unidade Nasional (PUN) Fernanda Mesquita Borges hateten ba Jornalista sira Segunda- Feira (24/5) iha Parlamentu Nasional.

Xefi bankada parlamentar FRETILIN hatutan, konferensia lideres bankada semana liu ba nia koloka kestaun barak los ne’ebé sai prioridade antes Parlamentu Nasionál reseitu iha loron 15 de Juilu.

“Ami koloka kestaun ba lei pensaun vitalisia ninian alterasaun ne’ebé ulun sira halo kanpaiña dehan FRETILIN mak hakarak halo diak ba ninia eis deputadus sira, eis membru Governu sira,”dehan Anicento.

Nia hatete, bankada Partidu Sosial Demokratiku (PSD) ne’ebé mos uluk hato’o ona rekerimentu atu halo revizaun lei konaba eistitulares sira nian.

“Agora to’o tempo atu koloka ajenda ne’e iha parlamentu, sira rasik mos hatama prozetu lei ida, to’o agora para hela iha meza, no la baisa ba komisaun atu komesa hahu deskuti,” katak Xefi bankada FRETILIN.

Iha sorin seluk xefi bankada parlamentar PUN nudar mos prezidenti komisaun A Fernanda Mesquita Borges hatete, nia parte eziji lei pensaun vitalisia atu debate iha plenaria, tamba iha tinan rua ona lei ne’e entrega ba meza.

Maibe Fernanda Borges dehan, lei pensaun vitalisia nia parte rasik lidera prosesu iha komisaun A nia laran hodi bele hadia lei refere.

“Ha’u entrega lei ne’e liu tiha tinan rua ne’e mak ha’u rasik eziji,” katak Borges.
Nia hatutan, foin dadaun konferensia lider bankada sira mos foti kestaun ne’e, tamba hare tempo liu ona.

“Agora ita kestiha ona, tamba saida meza la kohi tau ba debate lei pensaun vitalisia nian, tamba hakarak hein fulan rua ne’e karik, para deputadu foin sira AMP nian ne’e hodi hetan pensaun vitalisia,” dehan Borges.