Alkatiri Kesar Leandro Ba MP

PD Konsidera Hanesan Lisaun

Eis Primeiru Ministru Mari Alkatiri ne’ebé kesar eis deputadu husi Partidu Sosial Demokratika (PSD) Leandro Isaac ba Ministeriu Públiku (MP), relasiona ho akuzasaun ba eis Primeiru Ministru iha Primeiru no segundo Governu konstitusional Mari Alkatiri ho José Ramos Horta Aktual Prezidenti Republika simu subornu husi nasaun Kuwait. Maibe bankada parlamentar Partidu Demokratiku (PD) konsidera hanesan Lisaun ida.

“Ida ne’e hanesan lisaun bo’ot ida katak se enkuando hanorin ita katak labele akuza ema arbiru mas ida los mos ha’u hanoin buat diak ida ne’ebé hanesan eis deputadu ida hatudu katak buat ne’ebé nia rona nia hare nia atu hasai ba públiku katak ne’e los, ha’u hanoin prosesu normal ida importante mak buat hotu-hotu ne’ebé que mea koalia konaba ita ka ba ema seluk sempre liu husi tribunal,”hateten xefi bankada parlamentar PD Adriano do Nacimento ba Jornalista Jornal Nacional Diário foin lalais ne’e iha Parlamentu Nasionál.

Tuir xefi bankada parlamentar PD ne’e katak, dalana ne’ebé diak liu mak ema hotu tenki rezolve kazu liu husi tribunal tamba ne’e buat diak.

“Ha’u hanoin dalan diak ita hotu-hotu rejolve liu husi tribunal buat diak la’os buat at,”dehan Adriano.

Nia mós espera katak buat ne’ebé edis deputadu Leandro Isaac hato’o se ne’e la tuir dalan,entaun klaru que tribunal sei deside, mas se ne’e tebes mós diak ne’ebé nia (Leandro red) koalia mós sei hatan iha tribuna.

“Ha’u espera katak se ida los nia iha dadus konkretu, entaun bele lori ba KAK atu bele kontinua ka buat ne’e la los eis Primeiru Ministru lori nia ba tribunal, ha’u hanoin iha ne’eba informasaun sei sai públiku sei hatene buat ne’e los ka lae,” katak Adriano.

Tamba ne’e xefi bankada Partidu Demokratiku ne’e konsidera katak, Eis Primeiru Ministru Mari Alkatiri atu hatudu buat ne’ebé los ka la los liu husi desizaun tribunal.

“Ha’u hanoin Dr Mari Alkatiri atu hatudu buat ida ne’e atu los kalae ne’e nia lori ba tribunal deside informasaun leandro nia los kalae ne’e tribunal mak deside,”tenik nia.

Entertantu xefi bankada parlamentar Partidu Unidade Nasional (PUN) Fernanda Mequita Borges hateten katak, kazu ne’ebé iha faktus bele hatama iha Prokurador Geral Repúblika (PGR) atu investiga lolos.

“Ita nia rai nune’e kazu ne’ebé mosu ih faktus bele hatama ba iha prokurador Jeral da republika, ne’e labele taka hatama ba mak PGR investiga los ka la los,” dehan Borges.

Nia mós hatutan katak, iha alegasoens ka faktus hatama ba PGR hodi investiga, maibe tenki ho faktus ne’ebé iha labele koalia deit.

“Eis deputadu Akuza ema tenki iha prova, se nia hare halo korupsaun nia bele hato’o, maibe koalia deit mós labele tenki fó faktus,”katak Borges.

Nune’e mós deputadu husi bankada CNRT Aderito Hugo da Costa afirma katak, deskonfia ne’e bele halo qual quer sidadun sira ne’e bele halo ba ema satan autoridade públiku hanesan Primeru Ministru ka Prezidenti Repúblika, tamba sira nia kargu ne’e kargu públiku.

“Ita hein katak prosesu ba ita hare to’o mekanuismu legal ne’ebé iha instituisaun ne’ebé kompetetente hanesan Ministeriu Públiku ne’ebé Dr. Mari Alkatiri lori ba keisa, ita hein to’o sira atu halo prosesa,”katak Hugo.

Nia salienta katak, se prontu atu kaer kargu públiku, prontu atu hetan deskonfia bele mós to’o kondenasaun ne’ebé que sidadauk fó tamba kargu ne’e kargu púbiku, konsekuensia ba kargu públiku ne’e.

Tamba konstituisaun mós preve katak sidadaun iha direiru atu hatene informasaun lolos iha funsaun públiku ne’e, tamba ne’e sidadaun bele halo deskonfiansa.

“Ita hein mak instituisaun kompetensiua atu halo servisu, proseso ba buat sira ne’e para ita hodi bele hare lia los mak ida ne’ebé,”tenik Hugo.