Fernanda Borges: “Polisia La’os Uza Violensia Hala’o Kna’ar”
Unidade Polisia Task Force ne’ebé baku Jornalista Jornal Nacional Diário (JND) iha kuarta (15/6) kalan iha Palacio Governu nia oin. Prezidenti komisaun A ne’ebé trata asuntu Konstitusionais, Justisa, Administrasaun Públiku, Poder Lokal i Legislasau Governu, Fernanda Mesquita Borges hateten katak, Polisia la’os uza violensia hala’o kna’ar, tamba polisia hala’o kna’ar nein uza forsa.
Fernanda Mesquita Borges hato’o lia hirak ne’e ba Jornalista Jornal Nacional Diário, iha Parlamentu Nacionál Kinta-Feira (17/6).
Tuir Fernanda Borges katak, nasaun Timor Leste iha konstituisaun da repúblika ne’ebé regula ema hotu no iha laran konstituisaun lei inan ne’ebé dehan livre.
“La iha problema ida jornalista ida hasai fotografia ho polisia kaer ema, la iha problema ne’e akontese iha fatin ne’ebé-ne’ebé deit,”dehan Borges.
Nia dehan katak, Unidade Polisia Tasks Force ne’ebé baku jornalista i hadauk kamera apaga foto sira ne’ebé nia (jornalista red) hasai ne’e ditadura ona.
“Ne’e ita ditadura ona, Sekretariu Estadu tenki toma medidas, konkretas, hasai ema ne’e para investiga, treina nia ema polisia para ida ne’e labele akontese tan, investiga hahalok ne’e sala duni hatama ba Prokurador Geral da Republika, tamba nia abuza nia poder baku ema ida,” realsa Borges.
Xefi Komisaun A ne’e hatuir, Atu labele akontese tan atuasaun Unidade Polisia Tasks Force ne’e Polisia iha PNTL nia laran tenki hatene katak nia labele halo hanesan ne’e, fó sasaun mak nia hatene tamba koalia deit la to’o.
“Polisia labele baku ema sala mós labele baku, maibe polisia ne’e hala’o kna’ar ne’e sein baku sein uza forsa, polisia labele halo hanesan ne’e bele sai husi PNTL, Polisia atu hapara violensia, la’os uza violensia hala’o nia kna’ar,” nia dehan.
Iha sorin seluk Prezidenti Parlamentu Nasionál Fernando ‘La Sama’ de Araujo hatete, nia prte seidauk hetan informasaun polisia task Force ne’ebé baku jornalista.
“Ha’u seidauk hetan informasaun konkretu konaba kazu ida ne’e, apakah jornalista ne’e halo nia kna’ar lolos mak hetan baku ka iha buat seluk mak hetan baku,” hateten La Sama.
La Sama hatuir, ba ema hotuu atu jornalista sira bo’ok an halo servisu tuir kode etik jornalismu nian, i ba polisia mós hala’o nia servisu tuir nia regras i lei ne’ebé aprova iha Parlamentu.
“Regulamentus internu polisia ninian ita hotu-hotu atu hare ba ida ne’eba, maibe jornalista mós hanesan sidadaun se nia senti sai vitima iha dalan atu prosesa, hato’o ba iha Ministeriu Públiku prosesa ba tribunal se autoridade halo pratika violensia kontra ema ida ka bele la respeita husi lia fuan hanesan defamasaun ne’e ita nia lei konaba ida ne’e,”dehan La Sama.
Xefi Legislativu ne’e mós husu atu polisia no lider san sira ne’e tenki la’o tuir regras ne’ebé mak iha.
“Ha’u husu ba maluk sira ita hotu Timor-oan atu la’o tuir regras ne’ebé mak iha, liu-liu ami sira kaer ukun hanesan polisia hanesan Governu sira atu kaer ba lei, lei mak sei baze ba ita nia hahalok lor-loron,” tenik Prezidenti PN La Sama.
Tidak ada komentar:
Posting Komentar